消防處又入錯貨 指揮車多廁一舉

消防處買錯車，唔係新聞，不過喺十年如一日嘅官僚烏龍鬧劇中，有一樣嘢係永遠都咁有新意嘅，就係入錯貨嘅車種次次都唔同。火燭車啦、救護車啦、隧道拖車啦……鑊鑊新鮮鑊鑊傻。

嗱嗱嗱，大家咁聰明，一定知道太一叮想講乜啦，冇錯，消防處又又又又又買錯車。今次輪到衰乜呢？指揮車。

消防處最近用七百五十萬元購入一架新型流動指揮車，以取代沙田消防局嘅舊車。本來呢，添置新設備係好事，但當年有消防處高層阿茂整餅，要求新車加裝一個一點九米長嘅可伸延會議室，同埋一個方便高官如廁嘅洗手間。咁就死火嘞，新指揮車兩個月前付運抵港，部門發現兩項特殊設備令車身重量超過法例所限。即係話，買嚟救火救人嘅新指揮車，居然唔可以喺香港合法行走，你話係咪搞笑吖？

新指揮車變咗一架足不能出戶嘅「大戇車」固然搞笑，就算指運車瘦身成功都一樣唔掂，事關佢唔止超磅，更加超闊，足以佔據兩條行車線，根本不適宜喺香港使用。由此證明，消防處的確係一個「大戇居」。

消防處三番四次買錯車，浪費公帑事小，影響救人事大。當發生大型災難，指揮車都要奉命到場指揮救人工作。新指揮車一到埗就要「入廠減磅」，至今仍未瘦身成功，結果連累沙田消防局要暫時搵「消防Van」頂檔。Van仔充炮艇，話唔會影響救災效率就係假嘅！

叮你個鎯鎯，消防設備關乎人命，好心消防處帶腦買車啦。餐餐買錯裝備入錯貨，及早發現算好彩，一旦趕到災難現場至驚覺設施有問題，咁就死得人多。好似早年斥資七千萬元購入嘅十七架法國製油壓升降台消防車，居然射水無力，隨時救人不成反害人o架！

講番今次指揮車超重笑話，差啲講漏咗，當年嗰位要求指揮車「多廁一舉」嘅阿茂高官，就係前消防處一哥盧振雄。喺佢嘅退休儀式中，消防車搖身一變為派對布景板，今次指揮車加廁所加會議室，大而無當又係有人貪威之過囉！

所以話啫，超磅指揮車係大而無當，咁超戇消防處就係大而無腦：諗頭夠大，官威夠大，可惜無帶腦返工！