SUN世代：劇場自由行

人愈大，就愈習慣將自己繫於自製的枷鎖，不敢冒險。然而，作為電影界新一代的賴恩慈卻不一樣，她拒做職場機械人和金錢奴隸，只隨心所欲，投入萬變的劇場世界，集編、導、演於一身，去年奪香港藝術發展獎傑出青年藝術家獎。她的人生以理想主導，是自己話事的背包自由行。

「我無搵工呢個概念，可能我睇錢睇得太輕。」看得化，賴恩慈說與六歲前生活有關。自小在內地農村長大，那裏沒有如港孩般有學習七國語言和百般武藝的機會，只有大自然美景，盡情歡笑：「我呢刻都好記得六歲前嘅快樂，覺得好多事唔需要執着。」

心中無包袱，也會害怕世俗規條。小學時為逃避課室的四面牆，她曾試過逃課。這個坐不定的女孩創意無限，是中學時劇社的中流砥柱。中一那年，她製作首齣話劇，破格地諷刺英國侵略中國：「齣劇係講中秋節時，中國人喺月餅攝紙仔，搞反抗外國人嘅行動。」

轉讀電影實踐夢想

長大後，她依然愛創作、愛藝術。大學二年級時，她由英文系轉往電影電視系，以行動實踐藝術夢：「揀英文系係想家人安心，畢業後可以做教師維生，但讀咗一年發現真係唔適合我，我唔想閱讀人哋嘅嘢去寫論文，我希望係做創作。」

後來，賴恩慈到嶺南大學修讀文化研究碩士，取得世俗認同的高學歷。但她沒有尋求高薪要職，只在自資劇團「好戲量」擔任主席：「○三年加入好戲量，欣賞佢哋嘅街頭表演。當年咁啱係五十萬人大遊行，我醒覺社會變遷多數由街頭做起，就決定擺三年時間，但三年又三年，依家已經第九年！」

○八年，劇團做街頭表演被指阻街，有網上群組發起行動欲踢走他們，更有傳劇團與黑道打交道，或有成員裸跑表演等，賴恩慈不諱言飽受壓力，曾有解散劇團危機：「但我哋無做錯，唔能夠退縮，有危就有機，後來學術界、社運界都撐我哋。」

多年來，她將不少收入用於劇社，更將之打造成慈善劇團，全方位演繹不同的藝術模式：「藝術係多元化，所以除街頭表演外，亦有出書、拍嘢、戲劇教育。」問到如何維生，她說收入來自剪片或教戲劇班：「好多花錢嘅興趣我都唔鍾意。以前試過住喺排練室、唔使租地方、交通費。」她又拋下一句：「唔諗人工有幾多，其實可以做好多嘢，我唔使好出色，只想每日做喜歡嘅事。」心無包袱，路自然有無限多。

賴恩慈小檔案

現職：劇團好戲量主席、編劇、導演、演員

學歷：香港浸會大學電影電視系學士、嶺南大學修讀文化研究碩士

興趣：旅遊