政壇：政商定格：仁愛堂率學生勇闖珠峰
仁愛堂前日率領二十多個本港中學同大學生勇闖珠峰，宣揚環保訊息，為期十六天，期間會記錄整個考察過程，作為學術研究嘅真實數據。當日仁愛堂主席Dennis黃達東晨早到機場送機兼打氣，前主席蔡黃玲玲千金Elina蔡珍妮就隨團出發。
擔任團長嘅總理Clara陳婉珊原來已多次出征西藏，今次有備而來，帶定中藥紅景天對抗高山效應。團員喺山上每日都要量度血氧量、血壓同情緒變化，希望同學更了解自己體能上嘅極限，又會到冰川做水質測試，作為環保研究之用。
Elina就笑言今次最緊要帶齊相機同腳架，為旅程留下美麗回憶。為咗鍛煉強健體格，佢經常同媽媽孖住跑步。隨團嘅仲有前副主席張華強一家三口，佢哋上次已舉家去過北極，今次自然駕輕就熟。
黃達東（右一）勉勵同學全力以赴勇闖珠峰，發揮冒險精神。
蔡珍妮（左）遠征珠峰，媽媽蔡黃玲玲對佢好有信心。