政壇：搞搞政：高官三招破泛民拉布

泛民主派早前喺立法會大打拉布戰，所謂食髓知味，喺來屆立會必定重施故技，對付佢哋反對嘅法例同議案。據聞官府亦早作準備，廣集專家鑽研《議事規則》，仲獻計點樣剪布添！

啲高官分析，泛民拉布大可分為三招，一為提出上千條修訂或動議，表決浪費數十小時，破解招數係收緊主席對無聊瑣碎議案嘅執法準則；拉布第二招係喺全體委員會審議階段不斷輪流發言，破解招數係修改《議事規則》，限制議員就同一議案嘅發言次數，但呢招要修改《議事規則》，喺分組點票下難以獲得泛民支持。

拉布最後一招係要求響鐘點算出席人數博流會。高官指規限法定人數嘅《議事規則》第十七條，除訂明喺表決時要有一半議員在席外，並冇講明會議嘅所有時間都要計算法定人數，所以主席可將有關條文，重新解讀為只有喺召開會議一刻先要計數，等表決時議員先重返會議廳。

該名高官仲建議由內會通過決議提請主席「釋法」，以免主席自行「釋法」再受批評。雖然呢招破解唔到泛民狂提修訂同輪流發言，但已令拉布殺傷力大減，至少建制派唔使再受不斷響鐘之苦。