政壇：波波縮短外遊等做局長

盛傳會出任財政司副司長嘅「波波」陳茂波，因為政府架構重組通過唔到，加上放棄連任立法會會計界議席，隨時「雙失」。點知佢早前又好似食咗「誠實豆沙包」咁忽然表明心迹，話做發展局局長無經驗都唔係問題云云，變相證實佢會補上做局長嘅傳聞。佢尋日就自嘲做咗四年議員，估唔到咁易就畀人「chok」到料，自嘆認真水皮，仲索性爆料話會縮短陪囡囡去美國開學嘅行程添！睇嚟呢個局長真係坐定粒六喇。

至於幾時先會獲任命，佢就點都唔肯講。除要陪囡囡赴美開學外，佢尋日仲為自己嘅立法會接班人Nelson林智遠嘅造勢大會站台，希望力抗對手、泛民主派參選人梁繼昌。

Nelson造勢大會有成二百人出席，唔少唐營人士都係座上客，雖則好有建制派大和解意味，但波波同Nelson都異口同聲話，佢哋唔似對手咁有鐵票喎，總之就講到選舉好激烈。