政壇：鐵頭仁龜縮網民鬧爆

每逢政壇發生醜聞，白鴿黨主席「鐵頭仁」何俊仁例必企出嚟發表偉論，等自己既可以站喺道德高地批判其他人，又可以乘機出鏡爭曝光。不過，水唔可以亂抽，否則會抽出禍。

早排我哋寫過，鐵頭仁過去四年一直冇同立法會秘書處申報持有一間叫Fountain Success Investment Company Limited嘅公司股份同董事職位，違反立法會申報利益原則。

誠信破產遭聲討

雖然佢喺會期臨近結束前主動補回申報同向公眾致歉，辯稱事件只不過係無心之失，但有心水清嘅市民發現，佢每年都會以嗰間公司嘅董事身份向公司註冊處申報資料，又喺○四年為該公司持有嘅單位做按揭套現，質疑佢擺明有心隱瞞事件，而唔係好似佢所講嘅「唔記得」。

網民大鬧身為民選議員嘅鐵頭仁既然已報名參選超級議席，遲遲唔肯交代係不負責任，仲已經向議員立法會秘書處、警方同ICAC提出投訴。由於鐵頭仁連日態度龜縮，一班網民仲喺網上發起狙擊鐵頭仁漏報利益行動，諗住逼佢公開交代。

尋日鐵頭仁原定出席屯門一個地區活動，有當區居民一早喺討論區揚言會質問佢漏報事件。雖然成班網民一早擔定櫈仔坐定定喺會場等候鐵頭仁現身，但佢全程龜縮無露面，有網民發貼聲討鐵頭仁潛水甩底，又話佢嘅誠信已經破晒產。

正當大家奇怪緊鐵頭仁唔出席活動係咪想避開網民狙擊，但原來佢臨時甩底係為咗要去反國民教育遊行抽水博曝光，完全貫徹佢逢水必抽嘅性格。已報名參選超級區議會嘅仲有涂謹申、劉江華、李慧琼、陳婉嫻同白韻琹名單。