毅進報名反應冷 皆因課程無厘頭

孔子提倡有教無類，無論貧富貴賤、智愚善惡，都係一視同仁。點知香港無奇不有，話就話有教無類，可惜係另類嗰隻。

話說港府為配合三三四新學制，斥資十億元推出新毅進文憑課程，每年提供一萬五千個學額畀中學文憑試「肥佬」嘅同學報讀。點知反應奇差，拍晒烏蠅，網上報名日前截止，得六千九百幾名學生交咗報名費，連學額一半都唔到，同往年學生打晒蛇餅報讀嘅墟冚場面，簡直差天共地。

報名人數勁插水，有人質疑當局大安旨意宣傳不足。不過升學專家就篤爆，問題出在新課程認受性低，太多無必要嘅課程，連化妝同拉丁舞都有，完全係九唔搭八。

毅進變「藝晉」，班房變舞池，課程千奇百怪，但學費一啲都唔平o架，今年仲加咗近一成添。學費使咗，時間花咗，到頭來學無所用，你叫學生同家長點放心報讀吖？咁嘅「有教無類」，真係要唔要都罷，叮！

當局話喎，新毅進課程係「提供全人培育，訓練青年待人接物、語文和職業實務等技巧」。講就講得好聽喇，事實係唔係就要睇過至知。其實，毅進課程設計應該以協助學生日後順利投入社會工作為原則，唔可以偏離實用，否則，隨時變成「興趣班」，學生肯報名至奇。

課程認受性不足，唯一辦法係提高質量，增加對學生日後發展有用嘅內容，而唔係本末倒置，以娛樂性取代實用性。中英數送化妝、跳舞課程呢種「送分賣大包」嘅做法，根本就係濫竽充數，累人累物。

講開又講，喺新學制之下，今年中六畢業生加埋末代高考生，十萬學子爭入大學，但資助學額就杯水車薪，爭崩頭一啲都唔奇。前朝曾蔭權政府闊佬懶理，增加學額拖得就拖，一味攞副學士、毅進呢啲連認受性都有疑問嘅課程虛應故事，敷衍學生同家長，簡直不負責任。

多年來，當局對教育發展冇長遠規劃，教改愈改愈亂，大學學額僧多粥少，學生前路茫茫。新毅進冇人吼，其實係意料中事，如果新政府再唔撥亂反正，莘莘學子只會繼續做白老鼠嘅咋！