Sun人論壇：人禍

如果唔係一場特大颱風，真係唔知道呢個所謂國際大都會，原來連第三世界也不如。日前西貢發生大水浸，唔係講笑，足足兩呎水深，奇就奇在，專責保障渠道系統暢通嘅渠務署，竟然沒有派人通渠，最後搞到唔少車輛死火拋錨，長長車龍，確係幾蔚為奇觀喎！

香港近年每逢大雨，例牌會出現大水浸，上環一落大雨就有鮑參翅肚載浮載沉，至於旺角商戶，等渠務署郁手真係蚊瞓，經過咁多年嘅訓練，個個成為專業抗洪堆沙包專家。

記得年前大埔沙埔仔村奪命洪災嗎？雖然最後死因裁判庭裁定遇害村民是死於意外，但有邊個唔知道，罪魁禍首係廢到嘔、懶到爆嘅渠務署吖，如果唔係班蠢官亂咁搞河道改善工程，令到主幹流堵塞，呢單悲劇根本唔會發生，香港水浸黑點多成咁，唔係天災咁簡單，計我話，絕對係人禍呀！

本欄逢星期日見刊。園地公開，歡迎就時事局勢發表意見。請附上個人資料，電郵至sunmanforum@gmail.com