政壇：搞搞政：王卓祺做中策組顧問義工

中央政策組係港府系統內嘅「智囊」，梁班子上任近一個月，最近先公布咗中策組首席顧問邵善波嘅任命，另外三個中策組全職顧問位依家仲懸空緊，據聞其中一個好大機會嘅人就係中大亞太研究所副所長王卓祺，尋日王卓祺仲疑似偷步，以「義工」身份率先出席中策組會議。

中策組三大全職顧問未埋位，據知只係程序問題，不過，中策組嘅實際工作就似乎等唔切程序，尋日舉行例行會議，畀泛民炒到熱烘烘嘅國民教育爭議亦係討論議題之一，但據聞與會者冇乜爆炸性意見，令人意想唔到嘅係王卓祺現身，仲坐咗喺應該畀中策組全職顧問坐嘅位置添。

接受查詢時，王卓祺自稱尋日係以「義工」身份出席會議，又話自己過往間中都有列席喎。問及係咪會做中策組全職顧問，佢就話要等政府公布，言談間已露口風，承認或會以停薪留職形式，保留中大教職同時出任官職。