政壇：建制派內訌建仔選情危

九月立法會選舉戰況激烈，泛民鬼打鬼，一向嗌住「團結、和諧」嘅建制派一樣有內鬥，今屆仲協調失敗，喺多個地方選區同功能界別都有正面對撼之勢，其中民建聯就喺新界東、西分別派出兩張同三張名單搶位，但喺鄉事派分票下，如果西環下周截止提名前都冇辦法平亂，勸退部分參選名單，建仔真係隨時仆直。

鄉事派同建仔早喺去年區議會選舉已結怨，嚟緊九月之戰，新西方面有本身係商人嘅「第3力量」創辦人陳強，早前喺多名元朗同屯門鄉頭支持下報名參選，同區仲有屯門鄉委會主席何君堯，對建仔嘅譚耀宗同陳恆鑌、梁志祥三張名單絕對有威脅；新東方面，之前盛傳西環會出手，勸退經濟動力成員邱榮光，以免影響民建聯喺該區嘅選情，但經濟動力同佢本人都多番否認，但係建仔喺新東本身已經亂晒龍，陳克勤同葛珮帆兩張名單已有爭食嘅情況，內憂外患之下，真係好易一拍兩散o架。

已報名參選新西嘅仲有郭家麒、麥美娟、麥業成、田北辰、梁耀忠、李永達、陳樹英、陳偉業、李卓人、曾健成同陳一華名單。新東就仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、龐愛蘭、何民傑、梁安琪同方國珊名單。