政壇：張炳良口術難遏炒風

本港樓價高企、樓市炒風熾熱，當局早前宣布每年推出五千個白表申請人可免補居屋地價買二手居屋嘅措施，本嚟係想畀冇能力買私樓嘅市民有個置業途徑，點知反而將炒風蔓延到居屋市場，新措施面世約兩個禮拜，居屋成交價已經一升再升，尋日運輸及房屋局局長張炳良大出口術，話考慮喺新措施上增加轉售限制，防止短期圖利即係短炒居屋，不過，佢嘅新招有排未出籠，居屋價已經飆咗上去啦！

難為無殼族

張炳良尋日出席個電台節目，講到五千個名額免補地價買二手居屋，佢坦言聽到社會上有啲關注，擔心有白表人士購入單位後可能好快轉售圖利，令居屋市場都有炒風，有多年房委會工作經驗嘅張炳良話，建議喺計劃中加入轉售限制，同埋將五千個名額分階段推出，咁樣就可以防範居屋炒風喇，佢仲話，相信房屋委員會資助房屋小組討論計劃細節時，會參考呢啲意見、完善個計劃。

佢講到呢兩個限制，對遏止居屋炒風確有一定幫助，只不過，由政府宣布五千個名額到明年初落實呢個計劃，整整半年嘅時間可以發生好多事，好似近呢幾日，唔少居屋都傳出交易創新高價紀錄嘅消息，市區二手居屋閒閒哋都超過咗三百萬，即使免補地價，成交價都不菲，到計劃正式落實時，相關價格可能仲會繼續飆，無殼蝸牛真係好無奈。

講嚟講去，本地房地產市場畸形，住宅單位一直係最熱門嘅投資產品先係禍源，張炳良靠出口術都好難吹走居屋炒風，事關呢招仲弱過杯水車薪。