預測颱風神經刀 皆因缺乏五號波

颱風韋森特襲港,搞到香港滿目瘡痍,港鐵跪低,應變安排亂象叢生,而航空交通同樣大受影響,數千旅客滯留機場,直至尋日仍未全部疏導,引起怨聲載道,國際都會淪為國際笑柄。

今次係香港十三年來首次掛十號風球,雖然冇出現重大傷亡同水浸事故,但冧咗千幾棵樹,可以講係災情嚴重,尤其港鐵騰晒雞,政府玩隱形,乘客活受罪,本港國際形象一鋪清袋。

颱風係大自然現象,唔可能「拒諸門外」,但有備才能無患,及時、準確預測風勢及走向,係防災嘅唯一辦法。韋森特打殘香港,有關部門應對失措固然係主要原因,而天文台訊息混亂,機制缺失,同樣難辭其咎。

呢,天文台周一凌晨掛出三號波,當時仲話改掛更高風球機會唔大,點知下午放工時候突然改掛八號,一時間市民趕返屋企,全港交通大混亂。到深夜仲亂,天文台嗰頭改掛九號,呢頭又跳到十號,但唔夠三粒鐘就除低,成為本港歷來最短命嘅十號波。風球升也匆匆,降也匆匆,市民一頭霧水,無所適從。

話時話,天文台改掛八號波之前,本港已經橫風橫雨,訊號明顯未能反映實際風勢。如果當時有另一級別訊號作為緩衝,何至於搞到全城倒瀉籮蟹吖。其實,幾年前已經有人提議恢復五號風球,作為三號波與八號波之間嘅緩衝,但係當局一直拒絕接納,任由市民繼續年年面對「風雲突變」。

講開又講,以前本港有一、三、五、八、十號風球五個級別,可以準確反映颱風走勢。一號同三號係預警,五號係緩衝,八號同十號係烈風程度,清清楚楚,一目了然。點知後來港英政府以容易引起誤會為由停用五號波,增加九號波,結果搞出更多誤會。老實講吖,有八號同十號已經足夠喇,加多一個九號波簡直九唔搭八,多此一舉。

計太一叮話齋,係時候進行檢討嘞。恢復五號波好易啫,關鍵睇當局係咪從善如流,有冇決心撥亂反正。

仲有,本港可以利用檢討颱風預告機制嘅機會,同廣東、澳門當局商討制訂統一訊號及標準。講到粵港澳合作,除咗颱風預報,統一暴雨警報級別同樣重要。家陣本港分黃、紅、黑,內地有藍、黃、橙、紅,澳門自己亦有一套,有起事嚟,三地雞同鴨講,無法溝通,點合作吖?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報