侍產假有福同享 解民憂刻不容緩

好消息！打工仔有薪侍產假終於有聲氣，做「主人」嘅納稅人同公僕有福同享總算有一線希望嘞！

港府年底會向勞工顧問委員會提交侍產假報告，初步認為三至五日較為合適。當局相信，額外成本僱主可以負擔得起，對營商影響唔大，希望勞資雙方能夠達成共識，明年展開相關嘅立法程序。

好咯，第日「準爸爸」可以放番幾日有薪假，幫身懷六甲嘅另一半執頭執尾，盡吓一家之主嘅責任咯。至於打工仔幾時可以受惠，對唔住，呢樣嘢冇人答得到，要睇勞資雙方談判進展。

不過咁，如果閣下捧着政府工呢隻金飯碗就唔同講法，隨時可以印印腳歎侍產假。由今年四月一日起，所有合資格男性公務員同政府僱員，已經可以享用五日全薪侍產假。公僕放假湊仔仲有人工逗，唔止羨慕死其他打工仔，直頭恨死隔籬屋大肚婆喇，呢的就叫同人唔同命，同遮唔同柄嘞。

雖然話遲到好過冇到，問題係，公僕侍產假由曾蔭權舊年十月喺施政報告提出到正式實施，頭尾唔使半年已經搞掂。至於惠及全港，當局卻一拖再拖，最快要明年至成事，萬一勞資傾唔埋欄，打工仔只能夠繼續望天打卦。益自己友效率高到爆燈，唔怪得人哋話，港府先天下之樂而樂，後市民之憂而憂咯。

係人都知，煲呔曾政府施政乏善可陳，最叻就係「福為官開」。由推行五天工作周到侍產假，但凡涉及公務員切身利益嘅事，從來唔會龜速牛步。最離譜就係，無論經濟環境好定壞，當局幾乎年年都為自己友加人工，幅度更往往令市民「驚喜」，進一步激化社會嘅仇官情緒。

講番有薪侍產假呢筆，呢項福利喺好多先進國家同地區已經實施，本港社會對此亦早有共識。弊在煲呔曾在位七年蹉跎歲月，香港生育率幾乎全球包尾，人口老化問題嚴重，佢呼籲每對夫婦「最好生三個」，但齋噏唔做嘢，既冇長遠嘅人口政策，增加託兒服務、改善居住環境等配套措施亦統統拖得就拖，就算推行侍產假，都要玩官民有別，鼓勵生育根本就係大隻講。

港人近年對政府觀感愈來愈差，官民矛盾亦愈積愈深，煲呔曾難辭其咎。咪話太一叮唔提醒，新政府一定要引以為戒，要打造「民心工程」，最緊要公僕蟻民一視同仁。官民同心，其利斷金，咪令市民失望吖！