SUN微博：打橫嚟講：冧樹，又關你事？

以為在此厭煩的特區內，做人慘，原來，做樹同做雞一樣，一有乜病痛，唔使旨意政府會好好救治，諗辦法幫忙，最終，只會「一刀切」，全部劈掉。

雞鳥雀禽有瘟病，政府第一時間，將方圓百里內的雞隻大清殺，唔理有病無病，見一隻殺一隻，這就是機制，這就是向巿民負責的交代。

尖沙咀栢麗大道一百六十幾年來，活生生，給香港人無限裨益的細葉榕大樹，因政府的無知，用紅毛泥蓋樹根、噴藥位置亂嚟，唔聽樹木專家意見，搞到樹生癌，樹身中空倒冧，政務司司長林鄭月娥花了近兩小時工作時間親臨現場「指揮救災」，（當然乜都做唔到，只是給傳媒拍拍照而已），學足大陸領導人之外，更將古樹冧倒的原因推諉給七十年代起，香港政府已係咁樣對待樹木，聽上來，好似同佢五年前做發展局局長時的責任無關，但這日，佢身為香港政府第二號頭領，卻有更重要的「政治任務」不去處理，而落區指手畫腳，搞乜呀？好得閒嗎？如此小事都嚟「干預」，唔該放手畀區議會、樹木辦，或發展局啲廉價AO做啦！

林鄭咁做，除叫sit住發展局嘅曾俊華尷尬外，又摑了梁振英一巴，畀人感覺，佢做得嘢過CY，咁無智慧嘅show，唔好再做啦！唔該！

尖沙咀唔只一棵樹有癌！陸逐有來，千祈咪因樹癌又搞成政治議題呀！下次冧公廁唔知林鄭又嚟唔嚟？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係敢爆：你願意做國民小先鋒嗎?

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot