政壇：政商定格：多國領事學沖港式奶茶

咖啡紅茶協會尋日搞咗個奶茶工作坊，邀請德國、印度、哈薩克斯坦、馬來西亞等地嘅駐港領事同領事館代表，一齊學沖港式奶茶。尊貴嘅各國領事難得着起圍裙，初次炮製港式奶茶，大呼過癮！

喺一眾駐港領事之中，有幾位舉止斯文嘅靚女領事，沖茶拉得好落力，咖啡紅茶協會Simon黃家和試完佢哋沖嘅奶茶，都讚佢哋有天分。德國駐港澳領事館代表Ricarda Neukam來港只有三星期，佢話從未飲過港式奶茶，今次初嘗，大讚口感豐腴滑溜。

馬來西亞商務專員鄺琬琳就話馬拉嘅奶茶係用煉奶沖製，味道較甜，同層次豐富嘅港式奶茶相比，佢坦言較喜歡後者。印度駐港領事Chander Bhan仲帶咗三種貴族名茶畀大家認識，其中一種係著名嘅大吉嶺紅茶。靚茶葉價值不菲，領事笑言，一公斤大吉嶺茶葉，隨時貴過部iPhone 4S。