政壇：搞搞政：功能界別多立會失意人

從政人士嘅終極目標係「升呢」做立法會議員，但能夠脫穎而出者有如鳳毛麟角，粗略估計約有十人各因唔同原因未能參選，其中又以功能界別係失意軍人嘅集中營。

講到功能界別失意人不得不提體育界霍震霆，眾所周知佢係「四大懶蟲」之一，西環出手勸退換人嘅傳聞不脛而走，據聞佢對係咪競逐連任未有表態。但有接近佢嘅人士爆料，話佢喺下月十五日前都身在英國倫敦奧運會，喺分身不暇情況下報名參選機會極微。

旅遊界係另一個失意人嘅集中地，業界最新消息話該界別經協調後，好大機會只有中旅副總經理姚思榮同金怡假期董事長葉慶寧對決，一度磨拳擦掌出選嘅富貴黨何栢霆同經濟動力胡兆英，喺自知勝算一般下料將會雙雙棄選。

此外，建仔副主席張國鈞喺舊年底區議會選舉後，已被視為參選超級區議會嘅熱門人選，但最終卻因該黨選舉部署改變令願望落空，有傳黨有心栽培佢入政府，所以無奈地要佢棄選，另有指佢棄選主要係想多啲時間陪僅三個半月大嘅囡囡喎！