政壇：白姐姐累阿Paul「被收兵」

早前先傳聞今屆空降九龍東參選嘅阿Paul謝偉俊背後獲中聯辦力撐，畀咗二十幾位區議員做樁腳幫佢助選。但尋日有地區人士傳出消息，話自從阿Paul老婆白韻琹逆旨參選超級議席後，令中聯辦大怒，仲傳出阿Paul去咗中聯辦謝罪，但中聯辦堅持向謝偉俊「收兵」，寧願將樁腳歸邊畀工聯會黃國健。

我哋向阿Paul求證，佢聽到呢個消息後都好淡定，話同中聯辦不時有聯絡，但多數講旅遊界嘅嘢，好少談及選舉事務喎！咁為白姐姐「謝罪」算係家庭事務定乜嘢事務，真係得佢至知。至於白姐姐出選激嬲中聯辦，令西環決意「收兵」，阿Paul好坦白，話就算中聯辦「嬲都唔出奇」，因為白姐姐嘅參選令好多人都始料不及。

阿Paul仲好有信心咁講，未來幾日會密切留意班樁腳有冇走佬，如果真係「被收兵」都冇辦法，惟有靠自己喎。不過佢評估，覺得白姐姐出選都唔會對建制派構成威脅，反而會搶走民協馮檢基嘅票源。嘩！唔通呢個就係佢去西環謝罪嘅解說？參選九東嘅仲有陳鑑林、黃國健、胡志偉團隊同許錦成。