政壇：非「一」般參選人唔怕票少

除咗各大政黨大舉參選立法會選舉外，亦有另類參選人。自由工作者龐一鳴同牧師陳一華尋日分別宣布參選新界東同新界西，兩個人個名都有「一」字，仲話唔擔心會因為得票太低而被沒收選舉按金。

三十八歲嘅龐一鳴話參選理念係要反地產霸權，同埋為香港「創造更美好嘅事物」。為咗秉持佢拒絕幫襯地產商嘅精神，佢嘅誓師大會亦拒絕派發宣傳單張，團隊淨係着住印有龐一鳴背影嘅恤衫。佢話會同團隊成員踩單車向市民派發用環保紙印嘅單張，目的係要讓人口耳相傳咁宣揚佢嘅參選理念。

標榜立場中立兼獨立嘅陳一華話要用關懷嘅心服侍市民，尋日邀請咗港大法律專業學系助理教授張達明撐場。張達明話同陳牧師有共同理念，雖則兩人交往尚淺，但仍然請纓幫手助選。陳牧師就回敬：「好多嘢都係上天安排」，又話會按照聖經上「是其是、非其非」嘅原則進行選舉工程。陳係十大傑出青年。