政壇：許華傑京城雨災見真情
遭遇六十一年來最大暴雨，北京城一夜間變澤國，中華出入口商會副會長Michael許華傑都遭殃。
佢尋日透過長途電話講，前日同大仔Marcus、細仔Malcolm由廈門出發，點知一波三折，先係航班延遲了三粒鐘起飛，當飛抵北京上空時，又遇上巨大氣流，飛機猛烈搖晃，唔少乘客被嚇到尖叫同嘔吐，機師因無法降落，惟有轉飛大連。
幾經波折，佢喺尋日凌晨三點幾抵達首都機場，但的士因水浸嚴重無法進入的士站。正在徬徨之際，有市民召喚佢登上志願者林森嘅吉普車，原來北京居民喺微博發起義載，數百市民響應。有善心人拔刀相助，佢一家最後安全抵達酒店，佢想話畀番油錢，對方婉拒。佢深受感動，於是將善舉上載社交網站facebook，表揚吓對方喎！
大暴雨過後，北京尋日天朗氣清，Michael同囝囝登上長城輕鬆吓。