政壇：曾德成做鍵盤戰士 炮轟立會慢吞吞

曾德成當年仲喺傳媒任職時，出名詞鋒銳利，但入咗政府做民政事務局局長後就唔係好敢講嘢。不過佢每個禮拜都化身「鍵盤戰士」喺網誌撰文，從不間斷。尋日仲突然勇悍，開火炮轟立會添！

字裏行間透怒火

佢尋日喺網誌撰文，批評立法會嘅立法速度，令人諗起特首CY梁振英當選前已經成日講，政策嘅推展速度太過慢，覺得香港應該倣效新加坡模式，加快速度。估唔到呢個鍵盤戰士跟咗CY一個月，連口脗都似到十足十，唔通佢想換新形象？

篇文章題為「再談香港速度」，佢話本來打算今年七月前可以通過法例，向法援注資一億，但因為拉布事件，只夠時間通過決議案，趕唔切上財委會拎撥款。

從字裏行間可以見到佢嘅怒火，佢話有關法例已經醞釀咗兩年，今年五月已經向立法會作出預告，一心一意諗住七月前搞掂，預咗兩個月時間做緩衝。但人算不如天算，仍然未能喺今屆立法會會期通過，最快要等十月新一屆立法會會期先可以從頭嚟過，估計到年底至可以過一億元畀法援。篇文用字唔算辛辣，但句句到肉，最尾一句仲以「這是我們想見到的香港速度嗎？」作結，似乎係對拉布有好大控訴喎！

其實，立法會之所以成立，就係對行政機關作出監督，利用撥款權去保證公帑係用得其所，所以立法會從來唔係一個講求「快速」嘅地方，如果要快，政府自行立法就最快啦，相信德成局長都唔想見到香港變成行政機關獨大嘅局面。