護樹敷衍甩漏 百年古榕失救

真係好嘅唔靈醜嘅靈,早排太一叮至提醒過各位,喺香港行街屬於「高危動作」,隨時禍從天降,話口未完,尖沙咀遊客區就有大樹倒冧,差啲搞出人命。

栢麗購物大道一棵已經列入古樹名冊嘅百年細葉榕,因為抵受唔住病魔同天雨嘅雙重夾擊,前晚突然連根拔起,砸爛巴士站上蓋不特止,仲壓傷五名途人,其中一名女途人更被大樹壓到正,要由消防員救出,九死一生,險過剃頭。

遊人如鯽嘅購物熱點,十四米高大樹從天而降,牙煙程度真係諗起都不寒而慄。今次冧樹冇搞出人命,總算係不幸中嘅大幸,但唔係次次都咁好彩,萬一當年赤柱冧樹壓死大學女生嘅悲劇重演,試問當局點收科?

政務司司長林鄭月娥尋日到冧樹現場視察,聲稱專家小組今年一月同四月曾對呢棵樹做過檢查及風險評估,認為「可以接受」;佢又話樹木辦兩年前成立之後,曾多次邀請台灣同本港專家檢查彌敦道一帶嘅古樹,結果發現好多樹已經感染咗俗稱「樹癌」嘅褐根病,但都「可以接受」喎。

有冇兒戲啲吖?多次評估都話冇即時危險,「可以接受」嘅大樹居然話冧就冧,好明顯樹木辦做嘢敷衍甩漏喇。當局引述專家研究結果話,上世紀七十年代加咗花槽之後,呢啲樹嘅新生氣根被封死,唔止影響正常生長,亦令檢查人員難以察覺樹木有問題。

叮!簡直係一筆世紀糊塗帳,幾十年前已經存在嘅問題,從港英年代到特區政府,居然一直都冇諗辦法解決,消除隱患更加唔使講。就算被列入監察名單,亦係兒戲到極。專家指出,今次出事嗰棵樹,樹葉只剩番正常樹木嘅三成,普通人用肉眼都睇得出有病,當局居然一樣話冇事,簡直係靠害。樹木辦名為護樹,實為製造廢柴,叫「廢柴辦」就實至名歸嘞。

更得人驚嘅係,冧樹地點附近仲有兩棵古樹表面睇唔覺有事,其實已經受褐根病菌感染,病入膏肓。當局話,會即刻開會討論,唔排除會將有關古樹移除喎。

嗱嗱嗱,咪話太一叮唔提醒,颱風季節已經來臨,補鑊唔該認真啲,最緊要打醒十二分精神睇清睇楚,咪再求其是但,如果整多劑鬧市冧樹傷人意外,市民一定唔會放過你班廢柴官員o架,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報