政壇：搞搞政：長者津貼等議員放行

特首ＣＹ梁振英日前喺立法會特別答問大會，講明希望十月初可得到財委會撥款，將長者生活津貼增至二千二百元，令長者喺明年一月可開始申領，金額由今年十月計起。咁都係唔想啲議員又玩拉布啫，但根據正常程序，政府申請撥款要先到立會事務委員會討論，再交由財委會通過，但如果直接交到財委會，各黨派議員又係咪同意咁做呢？

白鴿黨副主席劉慧卿尋日喺黨團工作年結報告記招上話，新一屆立會議員最快到十月初先宣誓就職，就算嗰日即時選好財委會正副主席，開埋會傾撥款，都冇可能一次過通過。黨團召集人李華明仲加把口話，若果啲議員又要求開設另一個小組委員會，再傾多六十幾個鐘嘅話，肯定因快得慢。

富貴黨主席劉健儀就話立會嘅程序唔可以隨便破壞；人民力量陳偉業就叫CY要尊重立法會嘅制度。不過，建仔陳鑑林就力撐政府，話既然政策關乎民生，又已得到社會認同，立法會應該盡快通過撥款，否則會令啲公公婆婆失望，佢又叫啲議員唔好吓吓講程序，用咁多藉口去拖延政府政策喎。最終係咪如CY所願，就要睇啲議員係咪急市民所急喇，否則肯定畀市民鬧爆。