政壇：A股插水內地名人勁蝕

近排內地A股市場可以用「一潭死水」嚟形容，以下呢幾位股東就更慘，因為自己係名人嘅關係，身家縮咗幾多都會畀人公諸於世，講緊嘅就係籃球明星姚明、文壇名人余秋雨同知名導演馮小剛。

日前，被冠以姚明概念股嘅合眾思壯預告，今年上半年將會錄得虧損約2,500萬元（人民幣．下同），令到股價插水，低收14.87元。以依家姚明手頭上仲揸住105.3萬股合眾思壯計，市值同該股前年四月上市首日收市時嘅6,176萬元相比，已跌到1,605萬元，縮水足足七成，蒸發咗4,571萬元！另一位荷包大縮水嘅仲有文人余秋雨，佢投資咗十一年嘅徐家滙由舊年上市到依家，股價不斷下滑，而手持518.64萬股嘅佢，身家就由當初坐擁1.0855億元，暴跌一半至5,300多萬元。之不過，佢當年係以超平成本241萬元買入徐家匯股份，雖然帳面少咗一半，但計落仍有賺逾21倍。

據知內地導演馮小剛有意喺香港買樓，本來係華誼兄弟大股東嘅佢，持股已跌出十大以外，家陣華誼股價徘徊喺60元上下，同○九年首日收市價70.81元相比，馮小剛亦難逃身家縮水命運。