政壇：新舊白鴿未選先爆罵戰

由一班前白鴿黨黨員組成嘅新民主同盟，一直諗住喺立法會新界東攻佔一個議席，尋日佢哋正式報名參選，仲一口氣排出九人名單。呢條以西貢區議員Gary范國威為首嘅團隊，有八個係區議員，可以話係最多樁腳嘅一條參選團隊，唔打得都睇得吓。不過，尋日同時報名出戰新界東嘅白鴿黨黃成智就寸爆新民主同盟，話條隊排咁多人未必係好事，事關好可能會造成混亂喎，所以佢張名單只排一人喺後面。

Gary就反駁話，當初佢哋拒絕白鴿黨呢種大佬文化先至退黨，仲話九人報名有九人嘅好處，咁先凸顯到佢哋嘅團結。不過，世事嘅嘢真係唔到你唔信，新民主同盟九人名單中，排第九位嘅沙田區議員容溟舟，尋日突然入咗急症室，搞到成條名單報唔到名，要今日再去報多一次，認真爆。

今次黄成智真係開口中，原來人多真係會造成混亂。白鴿黨新舊黨員報名參選已經隔空爆發罵戰，到落區拉票嗰陣真係不堪設想。

其他參選新界東名單仲有工黨張超雄、富貴黨田北俊、工聯會葉偉明、人民力量陳志全同白鴿黨蔡耀昌。