政壇：何鍾泰奇招博連任

涉嫌騙取租金津貼嘅發展局局長麥齊光早前遭拘捕並辭職，近日立法會會計界議員陳茂波表白倘獲政府邀請做局長會義不容辭，睇嚟發展局結束「無人駕駛」嘅局面指日可待。

但喺局長人選仍未確定之際，立法會工程界議員何鍾泰尋日突然署名發出題為「任命發展局局長」嘅新聞稿，發表對呢個議題嘅睇法。佢首先話發展局局長一職自本月十二日懸空至今，一直由財爺鬍鬚曾兼任，有關安排唔理想，加上多項基建工程正進行得如火如荼，有迫切需要一個局長專注統籌本港大型基建發展。

佢之後又疑似意有所指話，過去一周坊間流傳幾位有意加入問責團隊人士嘅名，無疑佢哋過去都為社會作出各種貢獻，但之後口風一轉，稱讚工程界內有好多出色人士，所以已向政府建議「數名合適人選」，有傳其中一人係喺○六年退休嘅環境運輸及工務局常任秘書長嘅盧耀楨。

工程界議席競爭大

翻查資料顯示，盧耀楨喺七三年加入政府任結構工程師，並於九七年晉升為首席政府工程師，之後歷任土木工程署署長同路政署署長等，資歷絕對拍得住麥齊光。

話時話，何鍾泰突然高調建議局長人選，莫非佢想透過推薦局長人選，間接展示自己喺業界嘅江湖地位，甚至為佢角逐連任造勢？有人就估計同立會選舉戰況激烈有關。

事實上，何鍾泰今日會正式報名參選，據聞已取得近二百個提名，另外又得到前行政會議召集人鍾士元支持，睇怕今次工程界選舉必定奇招盡出，大家真係要拭目以待。已報名參選工程界嘅仲有盧偉國同陸宏廣。