立會懶蟲何其多 九月選舉掃垃圾

立法會有三多:政棍多,小丑多,懶蟲多。嗱,政棍同小丑,大家只要睇一次立法會開會,就包保大飽眼福。懶蟲就唔同嘞,唔係想見就見到o架,如果你真係喺議事堂見到佢哋,咁就恭喜晒,閣下嘅幸運指數同中六合彩頭獎不相伯仲,叮!

第四屆立法會聽日壽終正寢,本報為全體六十位議員考勤,最後得出嘅結論係:立法會不愧係政壇蛇竇!立法會過去四年總共召開一百五十二次例會同特首答問大會,結果六十名議員當中僅得七人全數出席,數字低得可憐,議員懶到出汁。最離譜嘅係「四大懶蟲」,會議出席率之低,同立法會嘅貼地民望有得揮。

邊四大懶蟲呀?大家都耳熟能詳咯,最出名嗰個叫李國寶,外號「三點不露」。其他三人係體育界霍震霆、中總代表黃宜弘、鄉議局主席劉皇發。其中霍震霆同李國寶嘅財委會出席率,分別係低得離譜嘅三成同三成八,內會出席率亦分別只係得三成四同五成三。佢哋唔羞家,市民有咁嘅懶蟲代表,都覺得丟架!

叮佢個鎯鎯,開會係議員嘅基本職責,連咁都做唔到,你哋班懶蟲仲講乜為民請命呀?議員只顧自己蛇王偷懶,又點叫市民相信你哋會為香港謀福祉呀?不得不提嘅係,開會只係市民對議員嘅最低要求嚟o架咋,懶蟲議員就算有開會,好多時候都只係瞓覺上網辦私務,再唔係就魂遊太虛,唔係用心做嘢o架。有議員夠膽死四年來從未提過一條質詢,就係最佳證明。

大模廝樣缺勤,行屍走肉開會,呢班議會大懶蟲究竟幾時至會痛改前非呢?對唔住,可能性真係細過行街有金執。佢哋年年被點名批評,年年繼續偷懶蛇王,甚至變本加厲,可見佢哋懶毒攻心,已經無可救藥。稍稍值得欣慰嘅係,李國寶終於宣布放棄競逐連任,超級懶蟲有望減少一隻。

立法會烏煙瘴氣,唔係搞風搞雨嘅政棍政客,就係吵吵鬧鬧嘅做騷小丑,再唔係就係尸位素餐嘅懶蟲懶蛇,「垃圾會」嘅外號果然實至名歸!

各位市民,既然立法會懶蟲懶到底,大家杜蟲亦要徹底。唔好手軟嘞,九月立法會選舉快到,大家認清邊啲係無恥政棍、邊啲係搞事小丑、邊啲係可惡懶蟲,一次過利用選票將所有政壇垃圾掃出立法會,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報