SUN微博：網絡小說：肥是原罪

「你食多舊係脂肪，人哋食少舊係死亡。」肥師上人喟然嘆曰。

肥師其實話得我無錯，正如網絡上有張相，左邊有一對基佬互攬互錫，右邊有一堆瘦骨嶙峋的非洲飢童，而世俗人往往覺得基佬冤眼。但諗深一層，其實是非洲飢童，先至最令人難受—尤其係我呢種死肥仔。雖然「非洲農業不發達，我們都去支援它。」之類的豪言壯語只可以留給金坷垃這種有實力左右美國總統選舉的企業，大概還不到我來做。但站在人道的立場，我還是覺得只有減肥，才可贖罪。

無錯，肥是原罪。

肥矮毒柒窮五宗罪中，只有肥是最深重的原罪。

矮，可以辯稱cute；毒，可以話係性格內向；柒，又只是身體某部分的部分狀態；窮，都可以賴「無父幹」。然而只有肥，絕對係你由細到大物質過剩又唔好好控制自己食欲的人格缺失甚至令人質疑其良知作分辨善惡和道德判斷的能力，而你又唔可以拎老婆出來擋箭就可以撇清的，罪惡—特別係喺我越過千山萬水，由孤城天水圍出來油麻地求見肥師上人時，佢劈頭點出我這團肥肉與全球化貧富懸殊的深刻關係。

只見肥師輕撫其鬆弛的「原罪」，合眼微笑道：「只緣身在此肥膏，他朝君體也相同。」我詫異非常，心諗點解佢會知我諗咩？佢點知我擔心緊自己太肥，所以先叫我珍惜做肥仔嘅緣分o架？而且用緣分去解釋，我當堂明白晒，因為即使我唔食，飢童嘅晚餐都唔會多咗碟餸！嚇窒咗嘅我擘大個口，卻只見肥師上人含笑不語。

我見肥師多嫵媚，料肥師見我應如是。

「掂哩！」我拍一拍自己個腦。「只緣身在此肥膏，他朝君體也相同。」每當我坐在飛機上的經濟客位而面臨「死肥仔買多個位啦」之類攻擊，我都會心中默念這句話。雖然呢句話講唔出啲咩大道理，但係我覺得非常之有親切感。

不過我心裏心裏仍然有個謎。縱我與非洲飢童實非「我不殺伯仁，伯仁卻為我而死」，而是如枯葉飄落，各有前因，莫衷一是，但肥作為五罪之首，為網友推動立法禁絕之的，即使吾等受上人開示，但世俗人仍以我滿身原罪為恥，參不透一切盡皆緣分。由是我該如何本眾生平等之意，不論肥瘦，慈航普度，達至彼岸呢？我資質駑鈍，不禁發問。

肥師在笑我，如看我表演棟篤笑般。他隨即從背後掏出一短棒，我自諳莫非要諷我肥人棍短？細看卻不似要當頭棒喝，而是遞給我，並道：「要普度眾生，先持此信物，問矮濟尊者。」剛交棒，我心情愉快。（待續）