政壇：馮國經嘆港人才遜星洲

身兼大珠三角商務委員會主席嘅利豐集團榮譽主席Victor馮國經，不時被傳參選特首，而佢尋日罕有咁喺大氣電波發聲，佢特別關心年輕人嘅發展機遇，呼籲香港大學生「走出去」，最好喺未畢業前去外國公司走一走，做暑期工也好，交流也好，總之放眼世界。佢又引用母校哈佛嘅教學模式，話呢間世界級學府要求每位學生要有出國工作經驗，目的係年輕人對一切都未有定見，可塑性好高，呢個做法值得香港各大專院校學習喎！

香港嘅優勢逐漸消失，佢亦慨嘆話，香港十幾年前，一直係東南亞華僑中心，跨國人才共冶一爐，可惜如今地位不保，被急速冒升嘅新加坡取代咗。佢為香港經濟拆局，認為香港人要有國際視野，更要認識中國，咁至可以擔當香港同珠三角、甚至東盟嘅發展橋樑。香港嘅市場唔係只得七百萬人，而係數以億計嘅內地同胞。

佢又點名讚爸爸馮漢柱係佢嘅伯樂。話說佢三十幾歲同細佬馮國綸由美國返港，接掌家族生意，爸爸給予莫大信任，放手畀兩兄弟一展所長。佢自爆撞板無數，直至今日，仍日日撞板，但佢認為板唔怕撞，撞多啲板先會進步。事業開遍世界，佢仍以「滿招損，謙受益」做人生座右銘，不時聆聽員工意見。