政壇：四無王桂壎唔怕抹紅

立法會選舉後日展開提名期，其中法律界席位一直係泛民主派嘅天下，建制派同獨立人士基本上連插針都插唔入，但今年或會有一番新氣象，因為立會法律界嘅資深議員較早前決定棄選，泛民好大機會僅派出資歷較淺嘅公文袋郭榮鏗參選，曾喺回歸前做過立法局助理法律顧問嘅Huen王桂壎尋日睇準時機率先表態決定加入戰團，又話有晒心理準備當畀人「抹紅」時點拆招，睇怕今次勢必有一番龍爭虎鬥。

強調係獨立人士

律師會前會長阿Huen尋日發出新聞稿，宣布參加法律界功能界別選舉，據聞佢呢次參選絕對唔係玩玩吓，至今已取得逾四百名業界選民提名，佢嘅支持者包括律師會前會長黃嘉純、前私隱專員吳斌等，佢又以「為民主企硬，同業界發聲」為競選口號，擺明要向業界展示堅定捍衞法治公義嘅形象。

不過，佢始終長期為業界奔走兩地，難免會有人出招「抹紅」，不過佢對此都有晒心理準備，強調自己係獨立人士，又笑言冇可能為咗引證「唔紅」而唔要回鄉證喎。

佢又提及今次參選主要係受一班業界年輕人嘅鼓勵，所以先令佢決定一試，又喺參選宣言意有所指話自己係「四無」，即無鐵票同票倉，亦都無政黨撐腰，更加無個人利益包袱，佢表明有信心代表業界做得更多喎！

話時話，法律界過去十多年一直係泛民嘅橋頭堡，形象相對獨立嘅阿Huen今次強勢出擊，預料同泛民代表會有一番惡鬥，究竟誰勝誰負大家要拭目以待喇！