何俊仁其身不正 大話精賊喊捉賊

有人話，政客嘅公信力比娼妓更加不如。真係冇講錯o架，政客講一套做一套，有口話人冇口話自己，信佢哋一成都死。

泛民主派近排對梁振英政府窮追猛打，大搞道德審判，大有黑雲壓城城欲摧之勢。點知剃人頭者人亦剃其頭，嗌得最大聲嘅白鴿黨主席兼立法會議員何俊仁原來其身不正，醜聞多多，根本冇資格對其他人指指點點。

何俊仁被踢爆過去四年一直漏報持有一間公司一半股權，以及公司董事身份，而該公司則擁有黃泥涌比華利山一個物業，臨近九月立法會選舉提名期前夕，佢至匆匆去信立法會秘書處「致歉」補鑊，辯稱以為股份已經轉讓他人喎。有市民直斥何俊仁講大話，佢由○四至一一年每年都以該公司董事身份簽署申報，身為律師嘅佢根本冇可能以為已轉讓股權。

其實，何俊仁唔止識講大話，仲識「毀屍滅迹」添。呢，佢天后廟道寓所露台原來有懷疑僭建嘅活動玻璃窗，做議員咁多年都唔清拆，直到舊年香港刮起僭建風暴至急急毀屍滅迹。最離譜就係，佢自己其身不正，竟然賊喊捉賊，藉住最近嘅僭建事件上綱上線，惡人先告狀，正一禮義廉，叮！

話時話，有錯唔認，寬己嚴人，白鴿黨不嬲都係咁嘅喇。呢，除咗何俊仁，佢嘅黨友黃成智咪又係同樣捲入僭建醜聞，呢班政客五十步笑一百步，簡直不知所謂。

學者就講得啱嘞，泛民政客一味以「顯微鏡、放大鏡」看待新班子嘅缺失，但就唔識得睇吓自己有冇行差踏錯或者漏報。所以話，呢班牛鬼蛇神又虛偽又冇誠信，佢哋嘅道德水平，直情連娼妓都不如！

其身不正，何以正人。泛民政客成日以民意代表自居，經常企喺道德高地指指點點，其實是非不分，九唔搭八，香港之所以淪落到今時今日烏煙瘴氣、亂七八糟嘅地步，佢哋可以講係罪魁禍首。

聖經有則故事，有人想用石頭擲死犯姦淫罪嘅婦女，耶穌對佢哋講，「你們中間誰是沒有罪的，就可以先拿起石頭打她」。呢個故事告誡世人，要批評其他人，首先要檢討自己。嗱，何俊仁醜聞纏身，誠信破產，小心搬起石頭砸自己腳吖，叮！