政壇：搞搞政：為博選票 白鴿黨亂啄人

立會選舉在即，政黨呢段時間都爭住出風頭、博宣傳，白鴿黨由上而下更全天候咬住新政府班子，先有黨主席何俊仁（鐵頭仁）向特首梁振英（CY）大宅僭建窮追猛打，仲要鬧上法庭；黨友李永達（高達）同陳樹英兩公婆就抓住港人港地、麥齊光事件，一陣舉報、一陣抗議，插得就插。抽咁多水，陳樹英無非為咗博上鏡、鐵頭仁同高達唔想畀激進泛民分票啫！不過，鐵頭仁自己都周身屎喇。

鐵頭仁位於天后廟道飛龍臺寓所，近排亦惹僭建疑雲，幾年前佢自行清拆露台活動玻璃窗，被懷疑係毀屍滅迹。跟住佢又被揭發喺立法會漏報公司董事身份及股份，臨近選舉先至主動去信立法會秘書處致歉補鑊。佢呢個技巧性嘅補鑊真係好肉酸，吼正立法會會期快將完結，立法會亦無法追究責任。

至於將喺新界西分隊出選嘅高達同陳樹英兩公婆，尋日前後腳去抗議CY冇履行承諾向長者派特惠生果金及「港人港地」政策，新班子僅上任十四日，施政報告仲未公布，就要CY履行承諾，唔知嗰啲做咗十幾年議員嘅人又履行咗幾多承諾呢﹖