政壇：建仔靠福建幫保議席

九月立法會選舉，議席雖然較前增加，但對急於增加政府實力嘅政黨嚟講仍係僧多粥少，今年建制派中民建聯、工聯會同自由黨都派人參選全力搶灘，民建聯同工聯會直接競爭下，為咗保住議席惟有搵「福建幫」做救兵，分別喺香港島同主打港九票源嘅超級區議會名單排第二，穩固票源嘅意味好濃。

建仔今日會公布立法會選舉參選名單，據聞大部分名字都無驚喜，最值得留意反而係佢哋要搵福建幫抬轎。消息話，兩名閩籍嘅東區區議員洪連杉同丁江浩，會分別排喺立法會議員李慧琼嘅超級區議會名單及東區區議會主席鍾樹根港島區名單嘅第二名，排陣反映該黨對福建幫嘅依賴。

不過，有人加入亦自然有人退出，據聞將首度排頭位參選新界東嘅沙田區議員葛珮帆，喺佢團隊入面排第二嘅西頁區議會副主席陳國旗會以個人理由退出，預料將由沙田區議員李世榮頂上，組成全新嘅「葛李配」爭取中產青年選票。