政壇：高永文吃盡「潮」文化

喺香港長大嘅潮州二代對家鄉認知各有差異，早前潮州商會青委主任陳光明（Johnny）就帶咗個團訪問潮州，呢個三日兩夜嘅「潮州文化雞精班」既尋幽探秘，又食潮菜做「潮人」，今次旅程吸引咗食物及衞生局局長高永文跟隊湊熱鬧，潮青副主任胡炎松（Anven）及潮商副會長周振基亦有隨隊。

呢一日先試潮菜，「臘腸高燒芋」、「拍蒜煎鎗魚」人人讚好，Johnny都話係首次品嘗。醫飽肚，眾人又參觀潮州永寧古寨，睇吓潮式建築嘅特色，又到潮汕歷史博物館及城鄉規劃展示館參觀，了解潮州文化。據講當地一名潮汕歷史教授與大家分享潮州女性嘅賢慧美德，無怨言照顧丈夫、子女及家公家婆，等丈夫無顧慮為事業打拚，造就今日好多潮州富商，實在應記一功。

行程結束前，眾人狂掃地道手打牛筋丸、墨魚丸、魚蛋等，掃足幾十斤至收手，各式潮州肉丸幾乎香爆架旅遊車。