政壇：吳文華出書論盡立法會

本屆立法會任期幾日後屆滿，會期完結後就有換屆選舉，新一屆議員再返嚟時，估計六十人中約半數係新面孔。立法會主席曾鈺成尋日分別喺兩個電台節目度講呢四年立法會經歷，仲爆咗即將卸任嘅秘書長吳文華（Pauline）退休後會寫本立法會嘅書，過去四年立法會最矚目嘅事當然唔少得新大樓、掟蕉同拉布，Pauline應該唔會放過呢啲題材啩！

議會反映社會改變

曾鈺成尋日喺兩個節目中都有講到呢三件事，正如佢所言，過去四年嘅立法會，有議員公然掟蕉、甚至拉布阻撓會議，有好多聲音都質疑議會文化劣質化，唔再好似三十年前咁高貴，官員議員喺個零鐘入面，歎杯咖啡、斯斯文文就傾完議程。但曾鈺成認為依家嘅議會反映香港社會嘅改變，縱使立法會中有對立，但無損訂立重要法規、監察政府用度等工作。佢又話，香港人可以反思同討論，想要一個點樣嘅議會、想要點樣嘅議會文化、想議員喺議會發揮乜嘢作用。

訪問中，佢笠咗頂高帽畀Pauline，話佢同秘書處嘅支援好重要，仲透露Pauline退休後會寫本關於立法會行事程序嘅書，相信對議會可持續發展好有用。如果Pauline呢本書定位喺程序上，睇怕掟蕉、拉布等被視為議會壞孩子行為嘅事都會觸及。

議員櫈新不如舊

添馬艦新政府總部趕入伙，甩漏多多備受批評，曾鈺成尋日都不諱言立法會「新不如舊」，其中一樣就係議員坐嘅櫈，因為呢張櫈識「反彈」，議員一起身張櫈就會撞番自己對腳度，好多人都認為舊時嗰張仲好坐。不過，主席嗰張就係由舊立法會搬過去嘅，曾鈺成話椅背夠直，坐得好舒服喎！