貪曾留低爛攤子 房屋問題怎收拾

佛偈話，萬般帶不走，惟有孽隨身。「第一貪官」曾蔭權啱啱相反，落台滾蛋帶走過千箱家當貪贓，唯一留低嘅，就係嗰缸錦鯉同埋一大堆施政爛攤子，真係罪過，叮！

講到貪曾嘅施政爛攤子，唔使問阿桂，最亂七八糟嘅梗係房屋問題啦。喺佢七年無能管治之下，樓價與民怨齊飛，租金與民憤齊飆，搞到周街都係望樓興嘆嘅無殼蝸牛，四圍都係蝸居劏房、棺材房嘅基層蟻民。家陣貪曾終於滾蛋，香港人幾時至可以脫離樓市苦海呢？

嗱，最新民調顯示，兩成七青年受訪者計劃未來五年置業，當中七成人有意買私樓，但係近六成受訪者直指現時樓價太高，脫離實際負擔能力，超過四成人表明無法負擔首期。另有四成半受訪者認為政府應該協助市民租樓住，其中兩成八人期望政府增設青年公屋名額。民調機構指出，年輕人對私樓嘅需求較公屋高，當局有需要喺房屋政策上促進佢哋向上流動。

睇完以上調查，大家係咪覺得既鼓舞又洩氣呢？鼓舞嘅係，樓市被貪曾搞成咁，年輕人始終無放棄安居樂業嘅人生夢想，渴求置業嘅大有人在。洩氣嘅係，樓價依然高與天齊，大部分年輕人根本只能望樓興嘆，繼續永無止境做無殼蝸牛。嗰種灰心絕望，同被打落十八層地獄永不超生無乜分別o架咋，叮！

試諗吓，年輕人係社會嘅棟樑，如果佢哋安居無望，怨氣上升，社會棟樑會唔會變社會「動源」，動亂之源o架？你知啦，過去七年民怨愈來愈大，矛盾愈來愈尖銳，抗爭愈來愈激進，示威人士竟然連民間七大武器之首嘅摺櫈都出埋，下次容乜易讓子彈飛o架！

所以咯喎，新特首梁振英話要「適度有為，穩中求變」，第一樣要有所作為嘅，就係對房屋政策撥亂反正。嗱嗱嗱，新行政會議成員張震遠有條橋唔錯o架，新政府不妨參考下。身兼市區重建局主席嘅佢接受東方報業集團專訪時倡議，香港未來除咗應該加建公屋同新居屋之外，更加應該復建夾心階層住屋，畀無力負擔私樓但又不合資格購買新居屋嘅中產一族有望一圓置業夢。

無錯嘞，新居屋同公屋畀年輕人上車上樓，夾屋就畀中產階層覓得安樂窩，的確有得諗o架。當然啦，學梁振英話齋，有為要適度，求變要穩陣，新政府必須小心行事，千祈咪搞到樓價大跌呀，香港人唔想重墮周街負資產嘅六道輪迴之中，叮！