政壇：政商定格：建築商介紹5萬蚊筍工
建造業人手短缺嘅問題一直解決唔到，肯入行嘅始終係少數，但工程數量就愈嚟愈多，尋日同建築商俊和主席彭一庭及副主席彭一邦兩兄弟傾開，佢哋講到個情況都幾誇張吓。
佢哋話過去一年建造業人工平均升咗大約兩至三成，個別工種仲唔止添，呢個升幅肯定係各行業中，至top嗰幾行。
一般人都覺得建造業日曬雨淋，又要擔擔抬抬，又容易有工傷意外，弱質女流就更加唔使諗，點知兩位彭生就話呢種諗法大錯特錯喎！
聽佢哋講，唔係所有地盤工都咁樣性質，有一種叫「安全主任」嘅工種，依家非常渴市，有幾年經驗嘅月薪可以去到四、五萬元，而且讀一個為時年幾嘅文憑課程就做得，同埋唔使搬重嘢，女仔都可以做㗎！仲有另一種，就係控制機器嘅「機手」，有冷氣房坐，月薪都有兩三萬元。聽起嚟都幾吸引喎！
俊和主席彭一庭（左）同副主席彭一邦（右）一齊巡視地盤。