政壇：搞搞政：怪醫傳參選業界混戰

一直盛傳立法會醫學界議員「怪醫」梁家騮唔再競逐連任，引來業界人士虎視眈眈。

最近突然傳出曾擔任四肢癱瘓「斌仔」鄧紹斌主診醫生嘅潘德鄰心思思想參選。佢依家係私人執業嘅骨科專科醫生，最令人津津樂道嘅係佢過去幾年赴四川地震災區做義工，除為傷者覆診同做手術外，仲隨身帶備一副古琴以慰藉傷者心靈。佢所屬嘅「七君子」選委名單，連同佢在內共有六人喺早前選舉當選，所以有一批堅實嘅支持者。我哋問過潘醫生係咪參選，佢就話仲未決定，先要睇定啲個形勢。

有意捲土重來嘅公立醫院醫生何栢良，最近喺社交網站facebook留言，話有好多人問佢參唔參選，佢話現階段唔能夠證實，亦唔能夠否認喎！

正當有傳潘、何有意參選之際，近日又傳出怪醫考慮競逐連任，佢現正製作任內工作報告。被問到係咪參選，佢就話仲要考慮多兩個星期先決定。咁即係話，醫學界可能會出現一場混戰。