廣東社團總會尋日舉行創會十六周年晚會，特首CY梁振英同政務司司長林鄭月娥率領多名局長撐場。新政府上場未夠兩星期已政事紛擾，總會主席KK王國強都睇唔過眼，致詞時公開表態全力支持CY落實施政理念，甚至話若特區政府需要幫手，聯會「要人有人，要錢有錢」，博得滿堂喝采。
發展局局長麥齊光落台，令人擔心新政府施政舉步維艱。新世界集團主席鄭家純更直斥事件係小題大做，話：「人邊有完人吖？擺明係雞蛋裏挑骨頭！」仲話社會和諧好重要，否則最大嘅受害者係香港市民，而佢都係一名普通市民咋！
王國強（前左）話撐新政府，梁振英笑住同佢握手。
