政壇：周聯僑「翻生」戰九西
前日工聯會先傳出，獲安排去九龍西出選嘅副理事長周聯僑，因為畀西環勸退，已幾乎確定九月冇得參選立法會，誰不知工聯會尋日公布參選名單，赫然又見到有佢個名喎！到底點解呢？
工聯會內部消息話，直到前晚為止，周聯僑其實都唔喺參選名單之上，反而會安排去第二區排隊助選，但由於工聯會內部壓力實在太大，好多會員都擔心佢真係唔出嘅話，會影響埋榮譽會長陳婉嫻出戰超級區議會嘅選情，所以榮譽會長鄭耀棠盡最後努力，成功力挽狂瀾咁話。
無論點都好，依家工聯會個「風車陣」叫做黐番塊車葉，可以繼續轉到，算係不幸中之大幸。總結佢哋嘅參選名單，嫻姐選超級議席帶動五區參選，除周聯僑選九龍西外，仲有黃國健戰九龍東、港島區係王國興、新界西麥美娟同新界東葉偉明，而勞工界功能界別就由鄧家彪同郭偉強接棒。
鄭耀棠（右）同理事長吳秋北公布參選名單。