競爭優勢不再 貪曾佗衰香港

唔講唔知，廣東省綜合競爭力排名全國第一，香港淪為老二，問你怕未？唉，曾蔭權禍港七年，香港優勢買少見少，金玉其外，敗絮其中，遲早連老二都保唔住呀！

中國城市競爭力研究會發表最新報告，香港綜合競爭力只有九十三分多啲，輸畀廣東省，屈居全國第二。點解會咁？原因就多咯，除咗因為內地近年發展速度驚人，更因為煲呔曾任內一事無成，貧富懸殊不斷惡化，無殼蝸牛愈來愈多，社會矛盾愈來愈激，本港競爭力優勢無以為繼，輸畀廣東又有乜出奇吖。

競爭力不如廣東，香港已經夠晒瘀皮嘅喇，原來更丟架都仲有。煲呔曾為官無德，成日掛住傍富豪黐飲黐食，貪腐醜聞爆不停，連累香港嘅誠信度由全國第一跌到連前十位都不入，你話羞唔羞家吖，叮！

講真，本港競爭力每況愈下早就唔係新聞。雖然多年來本港喺內地研究機構嘅調查中，綜合競爭力一直排名全國之首，但專家學者早就警告話，香港高租金、忽視高新科技發展呢啲老問題未解決，又有人口老化、人才流動不足等新問題，如果唔居安思危，只睇短期利益，本港經濟規模好快就會被內地城市爬頭，遲早邊緣化。結果不幸而言中。

叮！貪曾上台咁耐，香港衰足咁耐，貧富懸殊不斷惡化，堅尼系數冠絕全球；官商勾結達到極致，深層次矛盾有增無減；基層市民苦不堪言，無論社會、經濟或民生，統統搞到一鑊泡，仲留低一堆政治地雷畀下屆政府，正一累人累物累街坊。

煲呔曾劣政罄竹難書，最失敗嘅就係房屋政策。佢打住小政府、大市場旗號，七年來無所作為，坐視樓價狂飆，縱容大財團對小市民巧取豪奪。無論增加土地供應定復建居屋，拖得就拖，直到民怨爆煲至整個唔湯唔水、不知所謂嘅「置安心計劃」虛應故事。雖然新一屆政府將解決房屋問題列為首要任務，無奈貪曾欠帳太多，就算依家復建居屋，仲要等多幾年至落成，遠水根本難救近火。

貪曾治下，政府誠信破產，競爭優勢不再，市民安居夢碎。曾幾何時，香港係亞洲四小龍之一，家陣居然淪落到連小蟲都不如。貪曾佗衰香港，令七百萬市民蒙羞，呢個歷史罪人注定遺臭萬年，叮！