政壇：政商定格：龍B旋風席捲社交圈
今年龍B效應席捲社交圈，立法會議員梁劉柔芬女兒Nisa林梁穎宇懷孕七個月，腹大便便嘅佢早前出席菁英會執委晚宴，見佢不時摸住肚皮，待產心情好雀躍。佢報喜話腹中BB係囝囝，佢同老公都興奮不已。初次懷孕，食嘢口味無大變，一樣食得又瞓得。
餐飲聯業協會會長黃家和新抱Iris陳嘉琪懷胎八個幾月，BB女月尾出世，佢日前同老公Howard黃浩鈞出席廠商會盃賽，Howard話會陪太太入產房，已上定堂學剪臍帶，諗起都緊張。今年爆龍B潮，Iris都擔心將來B女入學要面對更大競爭，希望佢生得精乖伶俐，唔使父母操心，都考到好學校喎！
廠商會青委主席顏明潤都加入「龍媽」之列，早前誕下嘅「龍仔」已三個幾月大，兩個囝囝令佢感到心滿意足。佢笑言老公恨生女，但兩個夠晒數嘞，決定「收工」唔再生。
懷胎七個月嘅Nisa，慶幸book到床位待產。