政壇：工聯會風車戰陣崩潰

工聯會早就話嚟緊立法會選舉採取風車戰陣，即會派人喺超級區議會同五個地方選區參選。點知最近有傳西環出手勸退佢哋出選九龍西嘅副理事長周聯僑，甚至唔准佢哋再派人喺九龍西參選，但最終要等理事會開會後才揭曉。

周聯僑未出師就甩轆，最大得益者相信係同屬建制派嘅梁美芬。今次勸退除影響成個選舉部署外，隨時連參加超級區議會嘅工聯會榮譽會長陳婉嫻嘅選情都受影響。另一位榮譽會長鄭耀棠尋日講明嫻姐爭取選票會寸步不讓，暗示冇可能同其他建制派參選人協調到。

除風車戰陣崩潰外，尋日亦有匿名信話應徵做勞工及福利局副局長嘅工聯會前法律顧問鄺志堅已肯定獲聘任，遴選期間更請過勞福局局長張建宗飲一萬多元一支嘅紅酒、食九千元晚飯，做法等同買官職。勞福局發言人尋日嚴正否認事件，話指控係子虛烏有。我哋亦曾經多次聯絡鄺志堅，但至截稿前一直未有回覆。