政壇:女童軍籌款借梁太過橋?

貪曾兩公婆真係麻煩多多,敗走外國都留低蘇州屎累人累物。仍然由貪曾老婆曾鮑笑薇任會長嘅香港女童軍總會,被自稱係職員嘅人投訴,話曾太同現任總監彭徐美雲,今年五月二十五號向商界發信,邀請大家出席為女童軍籌款嘅慈善首映,訛稱特首夫人唐青儀會出席。

據講,原來梁太根本從來冇答應出席首映,而實際上梁太亦冇出席。呢位投訴人話,其實唔少商界人士都係慕梁太之名而來,大家都想見一見特首夫人,所以先咁踴躍捐錢,仲話當晚籌到近二百萬元!

我哋問過彭徐美雲,佢承認確有發信邀請梁太唐青儀出席首映,但絕對冇話實梁太一定出席,只係話鋼琴家郎朗會出席,唔明點解有咁嘅指控。

對於女童軍向商界發信一事,彭太更指與事實不符,佢只係內部發信畀會長、各副會長、名譽副會長同分會主席,通知有呢個慈善首映活動,呼籲佢哋按個人能力捐款支持。

彭太又話,已發信邀請梁太做女童軍總會會長,話梁太仍在考慮當中未答覆,但據聞梁太有意出任會長一職。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報