政壇:陳啟宗改口讚好兆頭

新政府上場未夠兩個星期,存心搞事嘅人製造唔少事端。一向力撐CY梁振英嘅恒隆地產董事長Ronnie陳啟宗,尋日撥亂反正,仲親自揭開日前恒隆突然入標競投前北角邨地皮嘅謎底。

係人都知,恒隆十幾年嚟都冇再出手喺香港投地,話要北望神州喎!不過日前恒隆突然入標書,競投擁有無敵海景嘅前北角邨地皮,引起政商界嘩然,有人估佢志在強勢力撐新政府。佢直斥傳言好戇居,話做生意梗係在商言商啦!

力撐CY心不變

原來佢諗住新政府啱啱上場,大地產商可能對地皮嘅興趣不大,想觀望一陣,所以佢咪入標執死雞囉!點知入標情況好踴躍,尋日競投結果揭盅,由新鴻基地產投得。雖然執雞夢碎,但Ronnie都冇乜所謂,事關商界對香港嘅投資前景仍然睇好,都係一個好訊息。

雖然近排Ronnie銷聲匿迹,但係佢力撐CY嘅心不變。身為香港明天更好基金主席嘅佢,六月下旬基金與一班理事去咗美國訪問,佢話好多當地智庫高層及政商界猛人都識得CY,係件好事。

新政府上場後,受唔少掣肘,Ronnie話,應該畀啲時間佢哋做嘢,唔應該凡事小題大做。至於CY僭建風波肯定唔涉及誠信,事關佢去過CY屋企,Ronnie作為地產商,都唔知嗰個玻璃棚係僭建喎!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白