廉署龜速查貪曾 拖延必定犯眾憎

曾蔭權爵士講過，退休願望係希望香港人盡快忘記佢喎。嗱，呢位痛心特首落台滾蛋一個星期嘞，大家有冇忘記佢呢？梗係冇啦！一個挾帶私逃嘅第一貪官，一日未落網歸案，市民又點會放過佢呢？叮！

咦，咪住，有人好似真係忘記咗貪曾喎。邊個對貪官咁寬容呢？邊個對貪腐罪行咁容忍呢？答案係廉政公署。

唔係咩？東方報業集團年初踢爆貪曾連串以權謀私醜聞，廉署話查、話查，查咗超過四個月嘞，完全無晒下文，廉署如果唔係失憶，就應該係包庇嘞。有乜可能慢動作成咁呀？貪曾都落埋台嘞，仲即時離開香港添，廉署依然郁都唔郁，呆若木雞，任由貪官遠走高飛，逍遙法外。好多市民都想問廉署一句，調查貪曾嘅最新進展係乜呀？

龜速查貪曾，必定犯眾憎。「東方報業民意調查」顯示，三成八受訪者認為廉署應加快調查進度；三成四人狠批廉署拖得太耐，要交代進展；一成二斥廉署失職。

講起都諷刺，一個自吹係誠實公僕嘅官場打工仔，最後淪為蠱惑貪婪嘅第一貪官；一個身為廉政公署直屬上司嘅香港當家，最終變成帶頭摧毀本港廉潔形象嘅廉政敗家仔。貪曾呀貪曾，唔好以為離開香港市民就唔記得你，閣下一身貪腐，罪孽深重，逃得出小小香港，逃唔出恢恢天網呀，叮！

叮你個鎯鎯，貪曾醜聞纏身，成為過街老鼠，其實，佢何止係老鼠，簡直係一粒老鼠屎，香港嘅廉潔清譽已經畀佢搞臭晒。○五年貪曾上任時，香港喺國際調查中廉潔度高踞亞洲第二，排名僅次於新加坡，直到今年初貪曾嘅貪腐醜行被陸續揭發，本港廉潔度排名就急轉直下，首次跌出三甲，排行第五。香港廉潔形象幾乎一鋪清袋，大家話嘞，如果唔將貪曾繩之以法，香港塊廉潔招牌仲點保得住吖？

係喎，講開又講，新政府開局失利，處處捱打，要扭轉劣勢其實唔難o架，眼前就有一個樹威立信嘅好機會，就係盡快查貪曾，依法捉貪官！貪曾係人民公敵，如果新政府打低呢隻大老虎咯喎，民望仲唔升到嘭嘭聲！

嗱，民意調查都係咁講o架，三成九人認為盡快查貪曾有助樹立強勢廉潔政府形象；三成一稱可以挽回市民信心。民意昭昭，事實證明捉拿貪曾就係民心所向！

一句講晒，市民忘不了貪曾，廉署唔好玩放生。放生貪曾等如與民為敵，新任廉政專員白韞六，仲唔快快撥亂反正，盡快調查貪曾？你都唔想成為下一個人民公敵o架，叮！