政壇：搞搞政：建仔工聯相煎何太急

工聯會同建仔過往喺選舉合作無間，但為咗擴大政治版圖，嚟緊嘅九月立法會選舉竟然搞到兄弟鬩牆。

立會新界西直選增至九個議席，無論建制派定係泛民主派都出現廝殺。建制派方面，有消息話建仔中人深入工聯會陣地，放出工聯會名單「夠票」當選嘅疑幻疑真消息，趁此名正言順深入工聯會地盤，挖走工聯會嘅樁腳。

被突襲嘅工聯會即時反擊，首先反踩入建仔地盤「試水溫」，另一方面又向自己人澄清不利流言，但有工聯會中人私下討論，始終建仔同工聯會關係太密切，所以避免誤會或畀人魚目混珠嘅最佳方法，就係退出建仔表明心迹，總之就要劃清界線。

據悉，最近工聯會中人退出建仔嘅數目唔少，聽聞至少有四個，包括北區區議員黃宏滔同曾勁聰、元朗區議員陸頌雄同陳文偉。但據聞佢哋退黨暫時仲係個人層面，唔係工聯會要佢哋「雙重身份」二揀一。睇怕建制派喺選舉前有更多「鬼打鬼」嘅場面，大家要拭目以待。

相反同屬建制派嘅田北辰就決心殺出一條血路，雖然佢係新界鄉議局顧問，但就打正旗號反僭建，諗住旗幟鮮明唔要鄉事票，城市人嘅票至係佢目標。佢仲喺網上聲言有人公然問佢買唔買票，佢當然唔會做呢啲嘢喇。