政壇：林公公邀撐枱腳葉劉冧晒

新民黨主席葉劉淑儀早前喺立法會審議是否優先處理政府架構重組決議案時，投下關鍵性嘅棄權票，粉碎特首梁振英希望五司十四局齊齊宣誓就職嘅心願。正當大家以為事件告一段落之際，望住投票結果「Ｏ嘴」嘅前政務司司長「林公公」林瑞麟，喺會後竟然請葉劉單對單去官邸共進晚餐。

葉劉話初頭收到林公公邀請時都覺得有啲驚，但點知林公公席間只係同佢大談昔日點滴，又多謝佢喺立法會嘅貢獻，絕口不提佢轉軚之事。葉劉畀林公公讚多幾句就成個人冧晒，覺得林公公臨走前都仲請佢食飯算係相當識做，大嘆林公公唔留任係「嘥料」喎！

提及立法會議員梁美芬新書錯字連篇，搞到其他想出書嘅議員變成驚弓之鳥，葉劉話佢嘅工作報告事前已經校對咗幾百次，拍心口保證文中唔會搵到一個錯字。佢仲話如果明知自己嘅文字功夫唔夠好，就應該用圖片轉移讀者視線，明顯意有所指。