政壇：劉健儀搵范太助拳
最近傳出有意由立法會功能組別轉戰港島直選嘅富貴黨主席劉健儀，成功拉攏立法會前主席范徐麗泰幫手，聽聞范太答允唔會親自蒲頭，但會暗助劉健儀幾位拉票樁腳。如果屬實，劉健儀喺港島區嘅選情可以樂觀番少少。
事實上，范太○四年時喺港島區參選時，可以話係吸盡中間派票源，之後到○八年，范太唔參選，佢嘅樁腳就轉為力捧當時剛回流嘅葉劉淑儀，亦成功令葉劉當選，如今葉劉可以靠個人名氣谷票，幾乎穩袋一席。所以最近有消息指出，幾位當年活躍灣仔區同東區嘅范太樁腳，近日靜悄悄暗幫劉健儀助選，部分雖然唔再係區議員，但都落手落腳聯絡街坊，對缺乏樁腳嘅劉健儀嚟講，簡直係一支強心針。
但知情人士分析，范太○四年參選，當年樁腳已被工聯會同建仔吸納得七七八八，究竟有幾多人可以幫劉健儀抬轎拉票?
有意由立法會功能組別轉戰港島直選嘅富貴黨主席劉健儀