政壇：張國柱執雞謀連任

立法會社福界議員張國柱尋日正式宣布競逐連任，仲話希望今屆可以攞到六千票，兼且會喺選舉提名期開始第一日報名參選，等佢可以盡快展開選舉工程。阿柱對今屆選情信心十足，話多人少人參選都係咁做宣傳，但如果有多啲建制派對手參選，佢會相應調整競選策略喎！

陳麗雲成頭號對手

雖然社福界素來係泛民堅實地盤，但建制派其實都有一定勢力，傳聞香港單親協會總幹事余秀珠、社會工作人員協會會長郁達芬都諗緊係咪挑戰阿柱嘅議席。余秀珠同郁達芬都係偏向建制嘅社福界人士，余秀珠係唐唐家臣林大輝創立嘅組織C18成員，而郁達芬就同特首CY梁振英相熟，曾經喺特首選舉當日發表聲明祝賀CY當選。二人已經喺舊年選委會選舉雙雙低票落敗，如果佢哋依家仲唔肯團結推舉一人出選，一定會將本身已經唔多嘅建制派票源攤薄再攤薄，試問咁又點可以撼贏阿柱呢？

不過，建制派實力分散唔代表阿柱一定贏梗，佢嘅最大對手相信非港大社會科學院副院長陳麗雲莫屬。陳麗雲雖然唔屬任何一個泛民政黨，但憑住佢濃厚嘅學術背景，加上一直拒絕偏幫政府，令佢深得泛民及建制兩邊社福界人士支持。觀乎佢喺選委會選舉拎到三千八百幾票榮登票后，同票王黃洪只係相差百幾票，就知道佢嘅實力絕對不容忽視。

有社福界人士分析，雖然陳麗雲可以吸納建制派票源，但建制派各懷鬼胎，相反泛民得阿柱一人出選，喺票源歸邊下泛民一定係最終得益者，睇嚟西環仲要一段時間先可以攻陷社福界呢個泛民橋頭堡。