庫房豬籠入水 扶貧勿靠張嘴

財政司司長曾俊華年年估錯數，因此被封為「史上最廢財爺」。不過咁，以前點樣估錯都好，希望佢今次唔好再錯喇，事關佢聲稱去年政府收入理想，會審視有冇適當措施幫助市民喎，即係話，今年好大機會派糖，千祈唔好大隻講吖！

鬍鬚曾話喎，去年利得稅同薪俸稅收入都比預期好，至於會唔會派糖，幾時落實特首梁振英提出嘅雙倍生果金等措施，佢就大賣關子，聲稱會同新班子詳細討論。

其實，就算鬍鬚曾唔講，係人都知港府豬籠入水，早就肥到着唔到襪。呢，早前公布嘅港府財務狀況顯示，上年度盈餘高達七百三十七億元，財政儲備接近七千億元，你話肥唔肥吖？最諷刺嘅係，庫房水浸嘅同時，本港堅尼系數亦創下零點五三七歷史高位，顯示貧富懸殊已到咗危險地步。官富民貧，加上通脹高企，百物騰貴，基層市民簡直度日如年。

所以話，港府派糖紓解民困，根本就係應有之義。雖然有人話一次性派糖只係甜下嘴巴，對扶貧作用唔大，但不可不知，派糖起碼可以令基層市民直接受惠，有得甜下嘴巴總好過乜都冇喇，係咪？再講吖，新政府啱啱上場，面對前朝遺落嘅爛攤子，要消除民怨，提升政府民望，扶貧紓困可以講係最直接及最有效嘅辦法。

當然，派糖始終只係短期紓困措施，要徹底解決貧窮問題，縮窄貧富差距，講到底都係要制訂長遠及全面嘅扶貧政策。新政府重設扶貧委員會，行出咗第一步，關鍵係要持之以恒，貫徹始終，千祈唔好學煲呔曾政府一味做騷，虎頭蛇尾。

話時話，香港貧富懸殊不斷惡化，深層次矛盾愈演愈烈，就係因為煲呔曾政府一事無成，佢自己貪威識食，根本唔理基層市民死活。最令人反感嘅係，港府窮到只剩下錢，仲一味做守財奴，就算迫於民意派錢，亦派到一塌糊塗。嗱，鬍鬚曾由舊政府過檔新政府，希望醒醒定定重新做官，唔好再十吓十吓，如果你真係唔識點樣派錢，不妨學吓澳門政府喇。

一句講晒，官富民貧冇可能維持社會和諧，更冇可能達成大和解，新政府想有所作為，就要顯示出應有嘅決心同承擔。計太一叮話齋，扶貧紓困就係最重要、最迫切嘅民生工程，知冇！